Mitthi tlangau thawm chuan mi rawn kaiharh a.Khatla South tilo hram teh ti a thatchhe taka duhthu lo sam ve mawlh mawlh pah chuan rizai hnuai atang chuan ka ngaithla ve kar a.Khatla South chu ani lo ngeimai,mahse khatla south kohhran ami ni thin,kohhran mi tak mai,kan vengchhunga mi anilo hlauh tiha ngaihthah mai theihloh tur boral thu chu an rawn puang ta dup dup mai a,ngaihtuahna a tikal thuive hle mai.Awle,tun kum 2011 tawplam ah hian chhiat kan tawk chho ta zut mai.Kumtir lamah chhiattawk an awmlo tihna nilo in kumtawp lam alo nih phei chuan vanduaina hi a langsar tamai emaw tih pawh a awl thin a ni ang, Krismas lo thleng tur urlawk a mi zawng zawng rilru a kan inbuatsaih lai anih vangte pawh ani thei bawk awm e.
A then chu kum pawh lam tam tawh ,a awmve tawh tho alawm tiha kan thlahliam an awm a, a then erawh a mak hle mai ti a kan zawi zui leh kan sep zui te an ni hlawm bawk.A khaikhawmna ah erawh chuan ala hunlo mang e kan ti tlangpui chu ani si a.Thihna hian hun leh awmni hi a neithei meuh angem le?.Thi tur hian ka hun viau tawh ani tih hi thil harsa tak anih ka ring thin,a hun leh hunloh tehtu tur erawh ka ni hauh lo thung.Thuziak mi Kaphlei a thukhawchang han hawh ta lawk mai ila “Mihring damrei zawng hi kan kum tam leh tamloh a teh tur ani lo a,kan thiltih azir a tehtur a ni’ a tih hi a dik khawp mai.Kum 100 chuang dam hriatreng hlawh mang silo te ai chuan kum 30/40 lek,kum sang chuang kaltawh ami an chanchin kan la sawi kan la sawi te hi an damrei chu an ni thei zawk ang.Mizo ah ngei pawh Pasaltha hmingthang leh huaisen,naupangte a thi,an damlai a an thiltih te avanga tunthleng a mizo rilru a la damte sawitur pawh kan hre nual awm e.
Hetiang loni lehzel hian ani ngaihtuahna titam ta chu.Ka damchhung kum ka lo hmanve tawh,kum sawmhnih chawhnu lam thleng hian thil tihthat leh sawizui tlak enge ka neihve le?.Thiamna lamah te,pumrua lamah te,hmelthatna lamah te,tlawmngaihna lamah te…ekhai,sawivek sen ani lo ang,mi te aia han san na leh han hriatreng na chhan tur ka van neilo tak em!.Ka thihni hi lo thlengve ta se ka chanchin hi ka ruang chungah engtin nge an rawn sawive ang le!, ‘A tleirawl lai chuan sual kawng reilo te a zawhve thin a,mahse a hnuah lo piangthar in kohhran leh KTP ahte a lo inhmang chho a,Sunday School zirtirtu ahte a tangve thin’ tih bakzawng chu mite hriatloh,ka felna leh ka thatna, ka chhungtena hmangaihna mit atanga min tehna lo chu sawichhuah tlak em em ka neih ka ringlo.
Tichuan hetiang hi ani tih hre rengin tihthat leh hriatreng tlak tur thil han tiha han belh tur chu ka hre lem chuanglo a.Bengsik leh pal nghenga kan ngaihtuah ngial pawh hian khawvel ah hian sulhnu ka hnutchhiah ve theihna awm hi ka la hrechhuak theilo tluangzel chu anih hi mawle,ka va damrei dawnlo tak em! Kum tamtak dam mah ila thihna ka tawhve hun chuan ka chhungte chuan min ngaive dawn tih chu ka hria,chutiang bawkin ka thiante pawhin min ngai ngei ang .Mahse thih hnu kum 3 liamvel a sawichhuah mangtawh loh tur leh thihcham bawrvel chauha hriatchhuah mai mai tur ni a ka ingaihtuah hian ka lungngai thin.Thih hnu a damreng theitur hian enge k tihtak ang le?
NANG I DAMREI DAWN EM ?
27 Nov 2001 Roy Lalhriatpuia
1 comments:
Post tha khawp mai.
Post a Comment